అభ్యంతరకరంగా టవల్ చుట్టుకుని స్టేజ్ మీద డ్యాన్స్.. స్కూల్‌కు ఎన్‌హెచ్ఆర్‌సీ నోటీసులు

పశ్చిమ బెంగాల్‌లోని కోల్‌కతాలో ఒక పాఠశాలలో జరిగిన కార్యక్రమంలో, ఇద్దరు బాలికలు బాలీవుడ్ పాటకు టవల్ చుట్టుకుని డ్యాన్స్ చేస్తున్న వీడియో దుమారం రేపిన విషయం తెలిసిందే. పాఠశాలలో జరిగిన సాంస్కృతిక కార్యక్రమంలో 'దిల్ వాలే దుల్హనియా లే జాయేంగే' చిత్రంలోని 'మేరే ఖ్వాబోం మే' పాటకు ఇద్దరు బాలికలు డ్యాన్స్ చేశారు. సినిమాలో నటి కాజోల్ ధరించిన విధంగానే తెల్లటి టవల్‌ను ధరించి వారు డ్యాన్స్ చేశారు.

ఇందుకు సంబంధించిన వీడియో సోషల్ మీడియాలో వైరల్ కావడంతో నెటిజన్లు తీవ్రంగా స్పందించారు. పాఠశాల పవిత్రమైన ప్రదేశమని, ఇలాంటి చోట జరిగిన సాంస్కృతిక కార్యక్రమంలో ఇంత అసభ్యకరంగా డ్యాన్స్ చేయడం సరికాదని చాలామంది అభిప్రాయపడ్డారు. పాఠశాలల్లో ఇలాంటి చేష్టల వల్ల యువత తప్పుడు మార్గంలో పయనిస్తుందని నెటిజన్లు వాపోయారు.

ఈ ఈవెంట్‌లో ఇద్దరు మైనర్ అమ్మాయిలు టవల్‌తో వేదిక మీద డ్యాన్స్ చేయడం సోషల్ మీడియాలో వైరల్ కావడంతో జాతీయ మానవ హక్కుల కమిషన్ (ఎన్‌హెచ్ఆర్‌సీ) స్పందించింది. ఈ ఘటనపై తీవ్ర ఆగ్రహం వ్యక్తం చేసింది. ఎన్‌హెచ్ఆర్‌సీకి ఫిర్యాదులు కూడా అందడంతో పాఠశాల యాజమాన్యానికి నోటీసులు పంపించింది.